الإثنين, أغسطس 10, 2020

تابعنا على

INSTAGRAM

YOUTUBE

اعلانات

ارشيف الموقع

arabjn
بيدخل كلية الهندسة حتي لو بالفلوس، يروح مغير حياته 180 درجة ويحط حرف الـ “Eng” جمب إسم الأكونت وأبوه يجيب ميكروفون ويقول “المهندس راح المهندس جه”، وماينفعش تنده بأسمه أو تقوله أستاذ كذا لا لازم تقولو “يابشمهندس”!.

بتدخل كلية الطب، وبتخسر كل أصحابك اللى دخلو كليات متوسطة حتى لو تعرفهم من إبتدائى، وبتبدأ تتعرف على ناس يكونو من نفس مستواك، وكل ما تقعد في قاعدة تتنحنح وترد بالقطارة، عشان تحسس الناس أن في فرق بينك وبينهم!.

بمجرد دخوله الكلية الحربيه أو كلية الشرطة، مناخيره بتترفع لفوق تلقائيًا،  ومش هو لوحده ده عيلته كلها بتغير أساميها، وأى حد ليه علاقه بيه بيغير أسمه، صاحب الظابط، أبن عم الظابط، حبيبة الظابط, أخت الظابط،  حظااااااابط !.

طالب تجاره إنجلش، ممكن تقوله إنت عندك عقم مابتخلفش وممكن يتقبل الموضوع، لكن تقارنه بطالب تجارة عربى، هتلاقى قنبلة شتايم خرجت في وشك، ليه يابن الناس تقارنه بواحد بيدفع 750 جنيه فى السنة، بواحد بيدفع 10 الاف جنية لمجرد إن اللى بيدرسه بالانجلش، نهار أسود، إنت أكيد غلطان .

بلد 90% من أهلها ماشين بمبدأ بنتنا ماتتجوزش إلا مهندس أو دكتور،  المهندس للمهندسة، والدكتور للدكتورة، والدكتورة ماتاخدش أقل من مهندس، أو دكتور أو ظابط شرطة، وفى عائلات مابياخدوش غير ظباط جيش، أه والله، وفى عائلات مابتدخلش حد بينها إلا إذا كان مهندس عشان يبقا إسمهم عيلة المهندسين، وماحدش يضيع شرف العيلة.

اللى معاه آيفون بيشوف نفسه على اللى معاه سامسونج، واللى بيجيب بنطلون جامد بيتصور بيه 100 صورة ويفضل يتصل بصحابه : “يازميلى مش أنا جبت بنطلون من “زارااااا”، اه والله زى مبؤلك تعالا يلا نخربها فى وسط البلد.

بتجيب قلم روج من ماك ولا كوتش من Nike ويجى عليه شوية تراب ماتشوفهمش إلا بالعين المجرده، فاتروح تكتب عـالفيس “ياريت الناس اللى مركزة فى حياتى تكون مبسوطة دلوقتى!”.

أول مابيخطب بيبدأ يعتزل صحابه ويختفى عنهم، ولو قعد معاهم مرة يحسسهم إنه العاقل الوحيد والناضج الأوحد، أول ما بتتخطب تفضل تتكلم بأديها كتير، وكل ما تكلم صحباتها تقلهم خطيبى راح خطيبى جه، وكأنها مخطوبة لـ ظافر عابدين.

انتوا من أول مابتصحوا لحد مابتناموا بتفطروا وتتغدوا وتتعشوا عنصرية، انتوا أكتر شعب بيعشق الماديات وبيعشق النفوذ والسلطة، كل واحد مسستم حياته على عدد ناس معينة، يعني إللى معاه عربية جاجوار أو مرسيدس لازم يوصل للناس اللى معاها نفس النوع ويتصاحب عليهم، وماينفعش انزل اقل من كدا، لو جتلك الفرصه اللى تشهر بيها عنصريتك بتشهرها علي حساب غيرك من غير ماتاخد بالك، “الخلاصة” … حُب الناس عمره ما كان بفلوس ولا بجاه ولا بـ عز ، حُب الناس برضي ربنا، وإخلاقك، ودعوات أمك وأبوك، غير كدا كله تراب في تراب، دا ‏الشبع في العين مش في البطن، والغنى في النفس مش في الجيب، والحلو في الروح مش في الشكل.

 

Tags: , , , ,

مقالات ذات صلة

No Related Article

0 Comments

Leave a Comment