الأربعاء, أغسطس 5, 2020

تابعنا على

INSTAGRAM

YOUTUBE

اعلانات

ارشيف الموقع

  • arabjn

  • فاكر لما طلعوا إشاعة إن فيفي عبده “الدولة” إختارتها أم مثالية و نشروا الإشاعة بكثافة و بقوا يشتموا يقولوا يا إبن المثالية و طلع الموضوع كذب

  • فاكر لما طلعوا نفس الإشاعة إن “الدولة” كرمت الرقاصة الي إبنها إغتصب و قتل طفلة و برضه طلع الموضوع كذب

  • فاكر لما قالوا السيسي أمه يهودية

  • فاكر أول ما تم الإعلان عن مشروع قناة السويس الجديدة لما قالوا فنكوش و مستحيل تتحفر في سنة

  • و بعدها قالوا مش هيقدروا يجمعوا فلوسها و الناس مش عبيطة تضيع فلوسها في فنكوش

  • و بعدها قالوا إن الدولة هتلغي الأرباح بتاع الشهادات

  • و بعد ده كله قالوا إن القناة بتنهار و الشركات هربت و المعدات غرقت

  • لما ده كله ما نفعش قالوا مافيش جدوى إقتصادية و المهم مشروع محور التنمية الي عمرك ما هتعمله عشان هيخلي دبي تفلس و الإمارات مش هتسمحلك ولما تم الإعلان عن مشروع محور التنمية قالوا فنكوش تاني

  • فاكر لما كانت الجملة المحفوظة بتاعتهم هي فنكوش المليون وحدة و المليون فدان و العاصمة الإدارية العاصمة الإدارية بدأ الشغل فيها والمليون وحدة إتسلم منهم 165 ألف و 100 ألف هيتسلموا حاليا و 400 ألف في خلال سنة والمليون فدان أصبحوا مليون و نص و تم الإعلان عنهم و كراسة الشروط نزلت

  • فاكر لما جثة ريجيني ظهرت و تاني يوم كانوا عند السفارة الإيطالية بيقولوا ريجيني مننا و إتقتل زينا و بعتوا إيميلات للصحف الإيطالية بيتهموا الدولة بتعذيبه و قتله

  • فاكر كلامهم عن برلمان سما المصري و أحمد عز وإن توفيق عكاشة هيبقى رئيس البرلمان

  • فاكر لما طلعوا إشاعة إن سيناء ضاعت و إن كلاب داعش إحتلوها و إنها نكسة زي 67 وإن الجيش إنهار و إنسحب خلاص

  • فاكر شهداء سيناء لما قالوا إنهم إتقتلوا في ليبيا والجيش عمل فيلم عشان ماحدش يعرف إننا بنحارب في ليبيا

  • فاكر لما الـ 21 مصري إتدبحوا في ليبيا و إشتغل الهجوم على الدولة الضعيفة الي ما بتعرفش تحمي مواطنيها و إن آخرنا كلمتين، ولما الطيران المصري طلع الفجر وأخد بتارهم نفس الناس قالوا إن ده إعتداء على سيادة دولة مجاورة و إن جيشنا ضرب المدنين و جابوا صور من سوريا

  • فاكر الشاب الي كان بيرمي الأولاد من فوق العمارة و قالوا عليه أمن دولة ومدسوس وبعد ما تم إعدامه قالوا شهيد الثورة و قتيل العسكر

  • فاكر الهيصة بتاع الإختفاء القسري و الأسماء الكتير جدا و طلع ناس منهم بره مصر و ناس منهم مع داعش وناس مقبوض عليها عادي وعليهم قضايا

  • فاكر لما شحنة فوسفات غرقت في النيل و قالوا إن مياه النيل إتلوثت للأبد و مش هينفع تتعالج و مصر إنتهت و جابوا خبراء من كل مكان يقولوا إن مصر أبيدت خلاص وبعدها قالوا إن مصر بتنتج فوسفات في السنة ب 20 مليار دولار و كلهم بيروحوا الجيش و ما بيدخلوش الموازنة العامة للدولة

  • فاكر لما مصر تعاقدت على الطيارات الرافال و كلهم قلبوا خبراء عسكريين و قالوا إنها طيارات أي كلام و غالية على الفاضي

فاكر الإشاعة الي انتشرت فجأه إن قناة بنما دخلها 30 مليار دولار في السنة و قناة السويس دخلها 5 مليار بس مع إن بتعدي في قناة السويس عدد سفن أكبر و ده معناه فساد و سرقة و طلعت الحقيقة إن قناة بنما دخلها لا يتعدى 2 مليار دولار في السنة

  • مش عايزك تنسى إنهم كل ما تيجي سيرة الجيش يسخروا منه إنه جيش المكرونة و الكحك و الحلل، واوعى تنسى إنهم دايما يستخدموا لفظ عسكر مش جيش

  • طبعا أكيد مش ناسي إنهم من بعد 30-6 و هم بيشككوا في إنتصار أكتوبر و بيعتبروه هزيمة و دلوقت بيعتبروا ثورة 23 يوليو 1952 إنقلاب مش ثورة

  • كمان من وقتها وهم عندهم حنين غريب لأيام الملكية, الي كانت مصر فيها أغنى شعوب الأرض وكنا بنسلف إنجلترا ومصر كانت جنة الله في الأرض والي خربها طبعا إنقلاب العسكر على الملك العظيم

  • فاكر إشاعة أن مصر صاحبة المركز الأول في حوادث الطرق على مستوى العالم الي هي كذب بالثلث

  • فاكر لما قالوا إن السيسي مضى على إتفاقية تحول نهر النيل من نهر دولي لنهر عابر للحدود و كده تنازل عن حق مصر في النيل, طبعا مافيش حاجة إسمها كده أصلا لا دولي ولا عابر للحدود و لا فيه إتفاقيات إتمضت و لا أي مصدر للكلام ده

  • طيب فاكر لما أعلنوا عن حقل غاز ظهر, و قالوا فنكوش, و بعدين قالوا خبر قديم و بعدين قالوا إن الشركة هتبيعه, و طبعا الشركة أعلنت إنها هتبدأ إنتاج في 2017 و إنه أكبر حقل في المتوسط كله و من أكبر الحقول في العالم

  • فاكر لما قالوا مشكلة الكهرباء مفتعلة أيام مرسي و لما إستمرت بعده غيروا كلامهم و قالوا يبقى مش ذنبه و إنها مش هتتحل و لما إتحلت قالوا ده قطعها عن المصانع و القرى عشان المدن و بعدها قالوا ده قلل الجهد و بوظ الأجهزة, يعني أي سبب غير إن فيه محطات جديدة إتعملت و حلت المشكلة

و الإشاعات بتاع إنخفاض مستوى المياه في النيل خلاص و إننا هنموت من العطش عشان سد النهضة و طلع السد أصلا ما إشتغلش لسه و دي حاجة بتحصل كل سنة إسمها السدة الشتوية

و إشاعة إلغاء شرط الجنسية لتملك الأراضي في سيناء و ما صاحبها من ضجة و طلعت إلغاء شهادة إثبات الجنسية الي كانت بتتطلب من السيناوية و الإكتفاء ببطاقة الرقم القومي

فاكر إشاعة إن إلهام شاهين هتفتح قناة دينية

فاكر إشاعة ال 70 مليار بتوع مبارك

و إشاعة ترميم معبد الكرنك بالمحارة و ما صاحبها من ضجة رهيبة و هجوم على مصر و مطالبة اليونسكو بالتدخل و إتضح إن المعبد كده من يوم ما تم إكتشافه و ترميمه من 100 سنة

فاكر الهيصة الي اتعملت على ضرائب تذاكر السفر و إن الضرائب زادت 400 جنيه على التذكرة و كم الهجوم الرهيب وقتها و في الآخر طلع الموضوع كله 50 جنيه زيادة على ضرائب التذكرة الي ما زادتش من 20 سنة تقريبا

شفت الصور الي نشروها لمظاهرات الجمعة 15-4 و طلعت من جمعة الغضب

فاكر الطيارة الي إتخطفت و راحت قبرص, مين الي كان نازل هجوم على البلد الخربانة يومها و أمن المطارات الفاشل و في الآخر طلعت كل الإجراءات سليمة تماما و إن التعامل كان طبقا للقواعد العالمية و مافيش أي خروقات أمنية

و بعدها قالوا إن الخاطف ده ظابط أمن دولة لأ ده كومبارس لأ ده بص العصفورة و من يومين ظهر بتيشيرت عليه علامة رابعة و السيسي قاتل

فاكر إشاعات إن صلاة التراويح في رمضان هتكون بالبطاقة و ممنوع الإعتكاف في المساجد و الحرب على الإسلام

طيب شفتهم لما كل ما حد يقول كلمة كويسة في حق البلد يخونوه و يشتموه, عملوها مع الأبنودي و فاروق جويده و محمد منير و فاروق الباز و أحمد زويل و قائمة طويلة جدا, و الوحيد الي فضل عالم فذ و جهبذ و بيحبوه الأخ عصام حجي لإنه بيهاجم البلد

من يومين إشاعة جديدة إن مصر هتشتري أسلحة من فرنسا ب 81 مليار جنيه و إحنا أصلا مزنوقين في الدولار و البلد وضعها الإقتصادي صعب, و أساسا كل الإتفاقيات الإقتصادية الي تم توقيعها ب 2 مليار يورو, بس طبعا ال 2 مليار يورو عندهم أكتر من ال 81 مليار جنيه

شفتهم لما سابوا المشاريع الي كانت بتفتتح و مسكوا في السجادة الحمرا و هاتك يا هري كام يوم, على فكرة عادي إنك تنتقد موضوع السجادة بس كمان خلي عندك دم و نظر و شوف كام مشروع تم إفتتاحه يومها

فاكر البوست الخارق بتاع الأخ الي كان عايز يصلي في غرفة القياس في محل في مول و رفضوا و هو نشره على إنها حرب على الإسلام و البوست اتعمله عشرات الآلاف من الشير بشكل هيستيري و في الآخر طلع محل أحذية, يعني مافيش مكان للصلاة أصلا ولا فيه غرفة قياس

____________________________________________________

إحنا ممكن نكتب حاجات من دي بلا نهاية, لإنها كتير جدا فعلا و كل يوم فيه حاجة جديدة

طيب إحنا عايزين نقول إيه ؟؟؟

ببساطة

هو الي بيعمل كده عايز إيه ؟؟

إوعى تكون فاكر إنه ضد السيسي

إوعى تكون فاكر إنه معارضة

الي بيعمل كده قاصد إنه يصدر لك طاقة سلبية و إحباط متواصل و ما يخليش عندك أي فرصة لإلتقاط الأنفاس و التفكير

هو عايزك دايما شايفها سواد

عايزك تفقد الثقة في كل حاجة

عايزك تفقد الإيمان بكل حاجة

تكره كل حاجة

هو عايزك تكره البلد بالي فيها و تفقد أي إنتماء

و النتيجة الحتمية للسواد ده كله هو إحباط أي محاولات إصلاحية أو إيجابية ممكن تحصل

الهدف النهائي هو إسقاط المؤسسات و على رأسها المؤسسة العسكرية و بالتالي إسقاط الدولة

فيه نقطة تانية في غاية الأهمية، الكذبة لما بتكون من حد مشهور و بتنتشر و بتتصدق، لما بتظهر الحقيقة بعدها عمرها ما بتنتشر بنفس القوة و بتكون الإشاعة أو الكذبة تحولت في عقول الناس لحقيقة خلاص

هو كمان بيحاول يخلي الباحث عن الحقيقة دايماً في موقف دفاع و كإنه متهم و هو الي بيهاجمك كل شوية بكذبة جديدة

السؤال الأخير, هو الي بيكذب و بعدين يكذب و بعدين يكذب و كل الي بيعمله إنه يكذب, أنا أصدقه و أقف في صفه ليه ؟؟؟ بأمارة إيه ؟؟

 

Tags: , , , , , , , , , , , ,

مقالات ذات صلة